Një tjetër pacient i infektuar nga koronavirusi ka ndërruar jetë mbrëmjen e sotme. Sipas Ministrisë së Shëndetësisë, bëhet fjalë për një grua 52-vjeçare nga Vlora.
Gjendja e saj ishte rënduar shumë dy ditët e fundit, teksa mësohet se ajo vuante edhe nga hipertensioni.
Kjo është pacientja e 9 e cila ndërron jetë nga koronavirusi në vend.
Njoftimi i Ministrisë së Shëndetësisë:
Mbrëmjen e sotme ka ndërruar jetë në spitalin Infektiv një paciente 52-vjeçare nga Vlora, e konfirmuar me COVID-19.
52-vjeçarja ishte e shtruar prej katër ditësh në spitalin infektiv në QSUT, ndërsa dy ditët e fundit gjendja e saj ishte rënduar dhe po trajtohej në terapi intensive. Pavarësisht përpjekjeve të stafit mjekësor, pacientja që vuante nga hipertensioni, nuk arriti të mbijetojë.
52-vjeçarja është viktima e nëntë e prekur nga COVID-19 në Shqipëri.
Ministria e Shëndetësisë i shpreh ngushëllimet familjes së të ndjerit dhe apelon qytetarët të respektojnë me shumë rigorozitet rregullat e izolimit dhe distancimit social si dhe të telefonojnë urgjencën kombëtare në numrin 127 në rast se kanë shenja të sëmundjes.
