Presidenti amerikan Donald Trump para pak ditësh deklaroi publikisht se nuk është gabim që koronavirusi të quhet “virusi kinez” pasi sipas tij faktet tregojnë se ai u përhap fillimisht në Kinë.
“Vjen nga Kina. Nuk është fare raciste”, është shprehur ai.
Mirëpo Kina nuk e ka pritur mirë këtë deklaratë të Trump, madje e ka kritikuar atë.
Ndërkohë, Trump vijon që t’i hedhë benzinë zjarrit dhe të provokojë.
Kësaj here ai ka deklaruar se “Aziatiko-amerikanët nuk duhet të fajësohen për shpërthimin e koronavirusit. Është shumë e rëndësishme që ne t’i mbrojmë plotësisht aziatiko-amerikanët. Ata janë njerëz të mahnitshëm”.
Ai i bëri komentet në kohën kur ka gjithnjë e më shumë raportime për sulme verbale dhe fizike ndaj komunitetit aziatik në SHBA, për shkak të pandemisë, shkruan “BBC”.
Koronavirusi vazhdon të përhapet në Shtetet e Bashkuara, ku aktualisht janë mbi 46,000 njerëz të infektuar dhe 610 të vdekur.
Organizata Botërore e Shëndetësisë, ndërkaq, ka lëshuar një udhëzim kundër “stigmatizimit të komuniteteve të caktuara” kur flitet për sëmundjen.
