Kryeministri Edi Rama ka reaguar pas shtimit të rasteve të reja me koronavirus në vend, duke thënë se Shqipëria është shumë më mirë se sa vendet e tjera.
Në një intervistë për Neës24, Rama deklaroi se masat kufizuese po respektohen nga shumica e popullsisë, me përjashtim të disa personave që janë të paktë në numër.
Kreu i qeverisë shtoi se kjo është një luftë në kolltuk dhe nuk është heroizëm por një detyrë themelore për të mbrojtur veten.
“Java që kemi hyrë është e parashikuar. Nuk kemi hedhur fall. Është algoritëm dhe bazuar mbi statistikat e botës. Është javë shumë shumë e vështirë. Por aman është vendimtare së bashku me një apo dy javët e tjera për të mos lejuar që numrat të shkojnë në stratosferë dhe pastaj të jetojmë një katastrofë humanitare dhe kombëtare”, tha ai.
I pyetur nëse ka dhënë ndonjë rezultat karantina 2-javore, Rama u shpreh se Shqipëria i ka marrë shpejt masat kufizuese, gjë e cila sipas tij ka ndihmuar në frenimin e virusit.
“Ka një model statistikor që është ndërtuar bazuar në trajektoren e vendeve pas 20 infektimeve të para. Nëse e shohim, ne jemi shumë më mirë se sa shumë vende të tjera. Pse? Sepse morëm masat më shpejt dhe po i respektojmë ato.
Ka një lloj alarmi, nuk është i pavend por edhe pak i ekzagjeruar pasi shkeljet që ndodhin dhe parregullsitë na acarojnë por janë minimale me atë që po bën shumica e popullsisë. Një rast në një treg, apo disa raste ecjesh në rrugë mirë është të eliminohen plotësisht. Por nuk janë një arsye për të thënë se po dështojmë në aplikimin e masave si popull. Po bëjmë diçka fantastike. Dhe duhet të eliminojmë çdo sjellje që të shmangim katastrofën që mos numërojmë mos o zot mijëra. Kjo mund të ndodhë nëse nuk jemi të vetëdijshëm, dhe të kemi humbje minimale. Edhe një humbje jete është humbje jete por duke ditur dhe duke qenë të vetëdijshëm që nuk i shmangim dot, duhet të jemi të fokusuar që me ndihmën me mbështetjen tonë, me besën tonë në këto luftë. Luftë në kolltuk dreqi e mori, luftë në kolltuk. Logjika e thjeshtë është ulu rri në kolltuk. Kjo nuk është një sakrificë e madhe. Kjo nuk është heroizëm që të rrish në shtëpi”, tha Rama.
