Teksa përpjekjet për gjetjen e një vaksine kundër koronavirusit vazhdojnë, Presidenti amerikan Donald Trump u ka bërë thirrje institucioneve të aprovojnë menjëherë dy ilaçe.
Bëhet fjalë për një ilaç që është përdorur kundër malaries dhe një medikament të përdorur për të trajtuar disa lloje infeksionesh.
Duke iu referuar një studimi francez në të cilin ka rezultuar se kombinimi i dy ilaçeve shkurton drastikisht zgjatjen e infeksionit, Trump i ka bërë thirrje FDA-së (Food and Drug Administration) që të aprovojë sa më shpejt përdorimin e këtyre medikamenteve për të sëmurët me COVID-19.
“HYDROXYCHLOROQUINE & AZITHROMYCIN, të marra së bashku, kanë probabilitetin të shënojnë revolucion në historinë e mjekësisë. FDA-ja ka lëvizur malet! Faleminderit! Shpresoj që të dyja të vihen në përdorim sa më shpejt. Njerëzit po vdesin, lëvizni shpejt dhe Zoti i bekoftë të gjithë!”- shkruan Trump në Twitter.
Kujtojmë se nga Ministria e Shëndetësisë deri më sot nuk ka pasur asnjë deklaratë zyrtare lidhur me medikamentet që po përdoren për të trajtuar të prekurit me koronavirus në vend.
Deklarata e vetme lidhur me këtë çështje ka qenë ajo e mjekut Tritan Kalo i cili nëpërmjet një postimi në rrjetet sociale, ka konfirmuar se të prekurit në Spitalin Infektiv po trajtohen me Aluvia (medikament për të prekurit me HIV që ka rezultuar i suksesshëm), Actemra (medikament kundër artritit që ka rezultuar i suksesshëm) dhe Tamiflu (antiviral që nuk ka rezultuar efektiv).
