Koronavirusi ka shkaktuar sot viktimën e tetë në Greqi.
Sipas mediave greke, gjatë ditës së sotme ndërroi jetë një 80-vjeçar në spitalin Papamakaristos në Athinë.
Mësohet se i moshuari pësoi komplikacione pasi vuante edhe nga sëmundje të tjera. Deri më tani në shtetin fqinj raportohen 464 të infektuar nga virusi vdekjeprurës.
Ndërkohë, qeveria vijon të shtrëngojë masat sa i përket frenimit të përhapjes së mëtejshme të këtij virusi. Nga e mërkura janë mbyllur të gjitha bizneset në vend, me përjashtim të supermarketeve, farmacive, furrave, pikave të shumicës me ushqime, karburanteve dhe bankave.
Ndërsa portet, aeroportet, urbanet, linjat interurbane, taksitë dhe metroja e Athinës do të vazhdojnë të jenë të hapura.
Edhe parlamenti do vijojë me seancat e tij, por me disa kufizime sa i përket numrit të folësve nga çdo parti.
Situata është përkeqësuar ndjeshëm në çdo vend të Evropës, teksa përditë po regjistrohen qindra viktima. Gjendja është më e rëndë në Itali, e cila mban edhe rekordin për numrin më të madh të vdekjeve të shënuara nga ky virus.
