Grupi i deputetëve të PS-së pritet të kallëzojnë penalisht ditën e nesërme ish-kryeministrin Sali Berisha.
Sipas njoftimit, grupi i deputetëve do ta kallëzojnë Berishën për përhapjen e informatave dhe njoftimeve të rreme në lidhje me koronavirusin.
Ata i bëjnë thirrje edhe Partisë Demokratike që të ndalojë daljen e përfaqësuesve të saj, të cilët sipas tyre përhapin panik në popull.
“Deputetë të Komisionit të Shëndetësisë në Kuvendin e Shqipërisë po ndjekin dhe vlerësojnë masat e marra për përballimin e situatës së emergjencës të krijuar në Shqipëri, si pasojë e përhapjes në shumë vende të botës së virusit COVID-19 dhe nevojën për solidaritet me bluzat e bardha të cilët kanë përgjegjësinë kryesore.
Ne konstatojmë me shqetësim disa veprime keqdashëse të disa personave politikë që synojnë të përhapin panik, mosbesim tek stafet mjekësore dhe demoralizim.
Për këtë qëllim bazuar në Nenin 267 të Kodit Penal në Republikën e Shqipërisë kemi vendosur të kallëzojmë penalisht shtetasin Sali Ram Berisha ish-deputet, për përhapjen e informatave apo njoftimeve të rreme, me imazhe të montuara apo komente me shkrim (përmes faqes së tij facebook), të cilat targetojnë opinionin publik duke nxitur me vetëdije një gjendje pasigurie dhe paniku tek njerëzit.
Gjithashtu i bëjmë thirrje Partisë Demokratike të ndalojë menjëherë daljen në Tiranë dhe në bashki të tjera të vendit të përfaqësuesve të saj, të instruktuar për të përhapur panik.
Kallëzimi i plotë penal do të depozitohet nesër në mëngjes në Prokurorinë e Tiranës”, njofton Grupi i deputetëve të Partisë Socialiste.
