Prej dy muajsh, apeli i hapur që vjen nga mjekët anembanë botës është që qytetarët të lajnë shpesh duart, si mbrojtja më e mirë ndaj viruseve. Përhapja e koronavirusit është në forma nga më të ndryshmet. Po kështu edhe Instituti i Shëndetit Publik i ka bërë thirrje qytetarëve shqiptarë të mbrojnë veten dhe të tjerët nga sëmundjet e shkaktuara nga koronaviruset, duke filluar me larjen e duarve. Në faqen e ISHP-së thuhet: “Lani shpesh duart me ujë dhe sapun, ose pastrojini ato duke i fërkuar me pastrues me bazë alkooli”.
Në bazë të një analize nga ‘Journal of Hospital Infection’, rezulton se jo vetëm koronavirusi, por të gjithë mikrobet e tjera mund të jetojnë në sipërfaqe për plot nëntë ditë. Një ndër gjërat që prekim më shumë është edhe telefoni, duke shtuar kështu rrezikun e marrjes së virusit.
Për të mos u prekur nga virusi vdekjeprurës, këshillohet që telefonat t’i pastrojmë herë pas here. Ka qenë drejtori i shërbimeve mjekësore të Ministrisë së Shëndetësisë në Singapor, Kenneth Mak, i cili në një konferencë u tha gazetarëve se pastrimi i telefonave celularë ishte një masë më e rëndësishme parandaluese, sesa vënia e një maske për fytyrën.
Më tej ai dha edhe disa këshilla se si duhet të pastrohet ekrani dhe sipërfaqja e telefonit: “Leckë e mikrofibrit, ujë, sapun. Këshillohet po ashtu që telefoni të mos përdoret në tualet”.
