Kreu i Grupit Parlamentar të PS, Taulant Balla, ka deklaruar se në takimin që ka pasur dje me krerët e diplomacisë së katër vendeve të BE, ka dëgjuar prej tyre qëndrimin kundër hapjes së negociatave për Shqipërinë të shprehur nga Meta.
Ai apeloi ndaj politikës, për të qënë bashkë për integrimin drejt BE-së. Duke shprehur zhgënjimin për qëndrimin e mbajtur nga Kreu i Shtetit, Ilir Meta, Balla zbuloi edhe letrat që u janë drejtuar presidentëve dhe kryeministrave të vendeve të BE. Kjo në tentativë, kundër hapjes së negociatave për Shqipërinë.
“Dje pasdite zhvilluam një takim me krerët e diplomacisë së katër vendeve të BE. Në asnjë moment, këto vende nuk e vënë në dyshim raportin e KE që vlerëson që prej vitit 2018 fillimin e bisedimeve për Shqipërinë.
Ky Kuvend bashkë me shumicën parlamentare është një reflektim i asaj që 97% e shqiptarëve mbështesin rrugën europiane të Shqipërisë.
Ne duhet të jemi gjithmonë së bashku. Bashkë me kolegët e opozitës parlamentare, jemi ndjerë të trishtuar nga qasja që Presidenti i Republikës kishte pasur ndaj ministrave të BE një orë para takimit me ne.
A thua se kishin folur me një president të një vendi kundërshtar me Shqipërinë. Duhet të kemi qasje për të fshehur vlerësim. Nuk dua të zgjatem më tej se si me lloj letrash drejtuar presidentëve dhe kryeministrave të vendeve të BE, Ilir Meta bashkë me ndonjë faktor të opozitës, ka një përpjekje për të dëmtuar vlerësimin që dha Komisioni Europian.
Dua të shpreh vlerësimin që pas shumë kohësh Këshilli Kombëtar për integrimin ka një agjendë intensive sa i përket drejtësisë, që mbetet gur themeli për integrimin”, u shpreh Balla.
