Ish-ministrja dhe ish-deputetja e LSI, Klajda Gjosha, zbuloi në emisionin “Tempora” në Rtv Ora, se në tubimin e 2 marsit doli si qytetare. Ajo u shpreh se shteti fillon te Kushtetuta, dhe është detyrë e të gjithë qytetarëve që ta mbrojnë kur dhunohet. Referuar djegies së mandateve, Gjosha tha se zgjedhja e deputetëve ishte e detyruar për shkak të cënimit të Kushtetutës.
“Unë isha si qytetare, por besoj se është detyrë e të gjithë qytetarëve për të mbrojtur Kushtetutën e Shqipërisë. Është libri themeltar i kësaj Republike ku ne jetojmë. Shteti aty fillon.
LSI ka një histori të gjatë me Kushtetutën. 2008 ka kulmuar, ka qenë një vrazhdë shumë e gjatë e mbylljes së disa politikanëve tanë brenda Kuvendit, për të mos ndryshuar atë sistem përfaqësie që ne kemi.
Kushtetuta ka probleme, por ky është tjetër koncept. Ne jemi të detyruar të mbrojmë këtë që është miratuar. Fakti që u larguam nga ai Parlament, kishte të bënte me cënimin e Kushtetutës. Besoj që është një sensibilizim, që më pas do të frenojë ndjeshëm të gjithë shkeljet që i bëhen Kushtetutës”, tha ajo.
Në tubimin e 2 marsit, Meta firmosi dekretin e tij të parë, për rrëzimin e marrjes së kompetencave të presidentit, për betimin e anëtarëve të Gjykatës Kushtetuese. Presidenti Meta duket i vendosur për rivendosjen e saj që e quan ‘sovranitetin e plotë të popullit shqiptar’, ku hodhi akuza dhe ndaj ndërkombëtarëve.
Sakaq, referuar kërcënimeve për shpërndarje të Parlamentit, kryeministri Rama tha se presidenti nuk e ka tagrin dhe të drejtën për ta bërë, ndërsa shtoi se nuk është aspak i çuditur nga “shpërthimet” e Ilir Metës apo sulmeve të tij ndaj ambasadorëve.
