Ministrja e Arsimit, Besa Shahini njofton se do t’i hiqet licenca shkollës private e cila pezulloi mësimin për dy javë për shkak të frikës nga koronavirusi.
Përmes një postimi në Facebook, Shahini sqaron se shkolla nuk ka respektuar ligjin, pasi institucionet arsimore mund të mbyllen jashtë planit të vitit shkollor vetëm me urdhër ministri.
Sipas ministres, nxënësit e kësaj shkolle do të transferohen në një institucion tjetër, ndërsa udhëheqësit e saj do të ndiqen penalisht.
“Shkolla mbyllet jashtë planit të vitit shkollor VETËM me urdhër ministri. Udhëheqësit e një shkolle private kishin vendosur të mos respektonin këtë dhe e kanë mbyllur shkollën për 2 javë.
Në kushte të kësaj paligjshmërie, jemi të detyruar që shkollës t’ia heqim licencën.
Nxënësit do të transferohen në një shkollë tjetër. Ndërsa udhëheqësit e shkollës që përhapin panik duke mbyllur shkollën në mënyrë të jashtëligjshme, për gjoja parandalim të një situate virale e cila NUK ekziston në Shqipëri, duhet të ndiqen nga organet e drejtësisë”, shkruan ajo në postimin e saj.
