Pas përfundimit të takimit me aleatët, kreu i PD-së, Lulzim Basha tha në një prononcim për mediat se Rilindja po bën një grusht shteti. Në vazhdën e denoncimeve, kryedemokrati Basha u shpreh me tone të larta se objektivi i kryeministrit Rama është kapja e Gjykatës Kushtetuese.
“Rama i ka bërë hesapet gabim”, tha më tej Basha, ndërsa foli edhe për takimin e mbajtur sot me Kreun e Shtetit, Ilir Meta.
“Presidenti i Republikës më ka njohur me të tjera fakte dhe prova tronditëse, të përfshirjes së personave të maxhorancës në Gjykatën Kushtetuese. Kapja e Kushtetueses është objektiv i Ramës. Atij i duhet për të mbrojtur kriminelët, dhe për të mbrojtur pushtetin e paligjshëm”, deklaroi Basha.
Ndër të tjera ai theksoi se rrotacioni i pushteteve është i pashmangshëm, por që kjo do arrihet me zgjedhje dhe me votën e shqiptarëve.
“Nuk do ketë forcë mbi tokë ta ndalë rrotacionin, ardhjen në pushtet të opozitës së bashkuar me votën e qytetarëve. Detyra jonë është ti bashkojmë qytetarët dhe për këtë po punojmë në disa rrafshe.
Nuk ka forcë mbi këtë dhe që të ndalë rrotacionin, i ka bërë hesapet gabim Edi Rama. Ia kam thënë para një muaji. Unë po bëj gjithçka që kjo të përfundojë me mjete politike për hir të stabilitetit, duhet që kjo të vijë pa kosto. Do bëj gjithçka që kjo të vijë me kosto të vogël për shqiptarët”.
Presidenti Ilir Meta ka depozituar sot një padi shtesë për kreun e Këshillit të Emërimeve në Drejtësi, Ardian Dvoranin. Në një reagim në Facebook, teksa ka publikuar dhe kallëzimin shtesë që e ka dorëzuar në SPAK, Meta shkruan se prova të reja do dalin në dritë shumë shpejt.
