Pas videos së shumë komentuar, kryebashkiaku Lefter Alla ka zgjedhur që të reagojë publikisht. Me anë të një komenti në rrjetin social Facebook, ai bën me dije se video në fjalë është e montuar.
Alla i qëndron besnik fjalës së thënë edhe më herët, duke ia deleguar fajin PD-së. Sipas tij, pamjet që qarkulluan në media nuk janë gjë tjetër veçse video-montazh të publikuar në bashkëpunim nga Partia Demokratike dhe një televizion lokal.
Po kështu, ai do të depozitojë edhe një padi në ngarkim të Ervin Salianjit. Ndër të tjera, kryebashkiaku sqaron se ekzistenca e videos në fjalë i është bërë me dije më parë, por ai mbetet me shpresë se drejtësia do të zbardhë këtë rast.
Statusi
Dua të informoj opinion publik të Bulqizës dhe të gjithë Shqipërisë, me të drejtë të shokuar nga një video-montazh të publikuar në bashkëpunim nga Partia Demokratike dhe një televizion lokal, se sot jam nisur drejt Tiranës ku do të depozitoj një padi në ngarkim të shtetasit Ervin Salianji, një person me aktivitet përsëritës kriminal për situata të ngjashme, referuar organeve të drejtësisë shqiptare.
Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë.
Prandaj deklaroj se unë do të pres zbardhjen e çdo vepre penale nga drejtësia.
Kushdo që më akuzon mua të presë veprimet e Prokurorisë dhe vendimin përkatës të Gjykatës.
