Partia Demokratike bën me dije se ditën e sotme ka nisur një kërkesë në drejtim të Prokurorisë së Dibrës në lidhje me hetimet e dosjes së famshme “184”. Kjo kërkesë e PD-së për organin e akuzës vjen vetëm pak ditë pasi Partia Demokratike u ul në reformën zgjedhore Damian Gjiknurin, një nga personat të cilët PD-ja e ka akuzar publikisht për vjedhje votash në Dibër.
Për më tepër, PD-ja ka kërkuar që dosja 184 të transferohet për hetimin në Prokurorinë e Posaçme Antikorrupsion dhe anti krimit të organizuar (SPAK).
Sipas letrës së PD-së dosja “ka faktuar bashkëpunimin e një grupi të strukturuar kriminal për vjedhjen e zgjedhjeve në Dibër të kryeministrit Edi Rama dhe bashkëpunëtorëve të tij Damian Gjiknuri, Saimir Tahiri, Ulsi Manja, Xhemal Qefalia, Pjerin Ndreu, shefi i komisariatit të Dibrës Robert Aga dhe disa personazhë të tjerë që u emëruan kryebashkiakë si Dionis Imeraj, Valbona Sako apo Agron Malaj”.
Sipas ligjit, duke qenë në cilësinë e kallëzuesit, PD ka të drejtë të marrë çdo informacion në lidhje me ecurinë e hetimeve, por në letër theksohet fakti se ky informacion mungon. Bazuar mbi të drejtën që i jep ligji, PD i ka drejtuar 3 kërkesa prokurorisë së Dibrës, e cila e mban prej 6 muajsh dosjen 184.
Këtu do të gjeni kërkesën e plotë: Shkrese-per-Prokurorine-Diber-15.01.2020
