Dalin pamjet nga operacioni i policisë në Vlorë për arrestimin shtetasit Xhevahir Jonuzi.
Nga pamjet e publikuara duken efektivët e forcave RENEA të cilët janë të armatosur deri në dhëmbë, teksa po nisen drejt banesës së vlonjatit të rrezikshëm në fshatin Hoshtimë.
Xhevahir Jonuzi, 47 vjeç, i cili mbeti i plagosur gjatë operacionit policor mëngjesin e sotëm, renditej në listën e policisë si një nga 8 më të rrezikshmit e Vlorës.
Mësohet se 47-vjeçari është dënuar me 25 vite burg për “Vrasje me paramendim” nga Gjykata e Rrethit Gjyqësor Vlorë. Veç kësaj, në vitin 2018 ndaj vlonjatit u mor masa e sigurisë “Arrest në burg”, për veprat penale “Prodhimi dhe shitja e lëndëve narkotike” dhe “Kultivimi i bimëve narkotike”.
Forcat RENEA zhvilluan një operacion policor ditën e sotme për të arrestuar Xhevahir Jonuzin, por ai ka tentuar t’u ikë atyre. 47-vjeçari mori një armë në dorë dhe ka hapur zjarr ndaj tyre, duke bërë që edhe forcat e policisë të hapnin zjarr ndaj tij.
Vlonjati mbeti i plagosur në këmbë, ndërsa ekipi i RENEAS i ka dhënë atij ndihmën e parë. Ai ndodhet në spital dhe është jashtë rrezikut për jetën.
