E ftuar në studion e “Java në RTSH”, Ministrja e Financave Anila Denaj ka zbuluar se në Shqipëri shumë shpejt do të investohet në 15 projekte strategjike nga kompani të huaja.
“Ne kemi gati 15 projekte strategjike që po shihen me objektivin për të investuar në Shqipëri dhe që vijnë nga vende të ndryshme të botës”, tha ministrja.
Denaj ka treguar dhe fushat ku do janë të fokusuara këto investimet: Bëhet fjalë për investime në sektorët e energjisë, infrastrukturës dhe turizmit”. “Këto janë edhe tre fushat kryesore për të zhvilluar ekonominë. Sa i takon investimeve të huaja një numër më i madh projektesh krijon një diversitet më të madh”, theksoi kreu i ministrisë së Financave.
Gjithashtu, ministrja ka folur dhe për programin e rindërtimit të shtëpive për familjet që u prekën nga tërmeti.
“Për Konferencën e Donatorëve ne presim angazhim pasi kemi punuar me një produkt që lexohet kollaj nga donatorët me BB, delegacionin e BE-së dhe UNDP-në. Këtë vit buxheti i shtetit parashikoi 20 miliardë lekë për programin e rindërtimit. Nëse nevoja na del për një vlerë më të madhe do ta shtrijmë mbështetjen buxhetore në 2 po 3 vite të tjera”, tha ajo.
