Ministri i Punëve të Jashtme të Serbisë, Ivica Daçiç, ka zbuluar se prapa nismës për mini-shengen qëndron Beogradi. Një gjë të tillë Daçiç e ka thënë derisa ka folur për pritjet që ka nga qeveria e re e Kosovës dhe heqjen e taksës. Sipas tij, Kosova me taksën e vendosur ndaj mallrave të Serbisë po tregon se është kundër pajtimit, ndërsa thotë se Beogradi po vepron plotësisht ndryshe duke propozuar mini-shengenin për t’i hequr të gjitha barrierat mes dy shteteve.
“Unë mendoj se jemi larg nga ajo (vazhdimi i dialogut), sepse institucionet e Kosovës duhet të krijohen. Se a do të krijohen apo jo është një pikëpyetje e madhe. Taksa është një vendim që s’e ka parë historia, sigurisht që ne nuk e konsiderojmë Kosovën si një shtet tjetër dhe këtu nuk bëhet fjalë për raporte bilaterale por… Beogradi propozon mini-shengenin, heqjen e të gjitha barrierave, dhe Prishtina vendos taksë 100 për qind. Është totalisht një vendim kundër përpjekjeve për normalizim dhe pajtim në gjithë rajonin. Ne nuk jemi shumë optimistë rreth kësaj, por ne do të shohim si do të rrjedhë situata. Në çdo rast Serbia do të jetë një faktor konstruktiv”, ka thënë Ivica Daçiç për Kosovo Online, i pyetur se a pret ndryshime të politikës kosovare, heqje të taksës dhe rifillim të dialogut.
