Presidenti i Serbisë, Aleksandar Vuçiç ka pranuar publikisht se në disa kryeqytete evropiane nuk ka entuziazëm për mini-Shengenin Ballkanik.
Në një intervistë për një televizion serb, Vuçiç tha se kreu i qeverisë shqiptare, Edi Rama ka treguar guxim.
Ai është shprehur se me heqjen e pengesave në lëvizje do të kursehej 2.5 miliardë në total, nga të cilat 1 miliardë vetëm në Serbi.
“Gjëja më e rëndësishme për njerëzit është që ata të fitojnë lirinë e lëvizjes, që bizneset tona të fitojnë më shumë. Nëse do të zvogëlonim vonesat e kufijve, do të kursenim 2.5 miliardë në total, për Serbinë të paktën një miliard. Imagjinoni se çfarë mund të bëhet në Serbi për ato para. Ne do të tërheqim shumë më shumë investitorë sepse ata do të ndjehen shumë më mirë në një treg pak më të gjerë.
Investitorët shikojnë ku ka më pak korrupsion. Ata do të vijnë kryesisht në Serbi. Kemi nevojë për punëtorë, a është më mirë për ne që të kemi një punëtor nga Kumanova apo të presim një kanadez? Kemi infermierët e parë që kthehen, edhe pse pagat e tyre janë akoma të ulëta”, tha ai.
