Ish-ministri i Drejtësisë, Ylli Manjani, ka befasuar me deklaratën ku thotë se duhet rotacion politik, por se beteja politike nuk mund të bazohet mbi tezën ‘s’kanë faj ligjet e as sistemi, por Rama’.
Manjani shprehet se Rama duhet hequr pa vonesë, por ai ende nuk është i bindur për veprimet e opozitës. Sipas tij, opozita duhet të ketë gati sistemin e ri të sundimit Kushtetues dhe ligjor.
Ai citon se opozita duhet të ketë gati të programuar dhe me produkte Kushtetutën e re; sistemin e ri zgjedhor; legjislacionin (të paktën konceptet e përgjithshme) procedural që rrit garancitë për procese të rregullta ligjore. Po kështu paketën e ndërhyrjeve afat shkurtër që shfuqizon të gjitha ndërhyrjet moniste në legjislacion. Sipas tij, opozita duhet medeomos ti ketë këto instrumente gati, për t’ia treguar shqiptarëve se e ka seriozisht demokracinë, shtetin dhe politikën.
Statusi
Sistemi apo personi?
===========
Nuk kam ndryshuar mendim as bindjen se vendi ka nevojë për rotacion politik. Sigurisht duke rikthyer pluralizmin politik dhe zgjedhjet e lira e të ndershme.
Pa asnjë dyshim, mbetem besnik i kësaj ideje.
Mirëpo na pëlqen apo jo, beteja politike nuk mund të bazohet mbi tezën që “skanë faj ligjet e as sistemi, por Rama”!!!”.
Kjo është e rrezikshme dhe nuk ngjall shpresë. Se nuk mund të sjellë shpresë ideja që të heqim Ramën dhe të qeverisim sistemin që lë Ai!!!
Ndoshta këtu e ka burimin njëfare skepticizmi ndaj opozitës së sotme…
Unë vetë e rrefuzoj këtë ide, pra të personalizimit të betejës politike, pavarësisht se nuk do tërhiqem nga kontributi për rotacionin aq të domosdoshëm.
E refuzoj sepse sistemi i sundimit politik ku jemi zhytur duhet përmbysur për të vendosur sundimin ligjit dhe Rendin Kushtetues të Republikës.
Personat nuk janë garanci, sistemi po!
Për të qenë më konkret akoma, nuk o bashkohem dot as idesë së artikuluar nga opozitarë që “fajin e ka Rama dhe se gjithë beteja të bëhet për heqjen e tij”!
Ai duhet hequr, pa vonesë madje, por mbi të gjitha opozita duhet të ketë gati sistemin e ri të sundimit Kushtetues dhe ligjor. Duhet ta kishte tashmë!
Duhet të ketë gati të programuar dhe me produkte, Kushtetutën e Re; Sistemin e ri zgjedhor; legjislacionin (të paktën konceptet e përgjithshme) procedural që rrit garancitë për procese të rregullta ligjore; paketën e ndërhyrjeve afat shkurtër që shfuqizon të gjitha ndërhyrjet moniste në legjislacion.
Pa dyshim që opozita duhet të ketë këto instrumente gati, tja tregojë shqiptarëve se e ka seriozisht demokracinë, shtetin dhe politikën!
Përndryshe, të presim të ikë Rama që të vijmë ne nuk ngjit! Mund të ndodhë si ngjarje, por nuk ngjit sepse nuk ndryshon asgjë, përveç fytyrave.
Unë nuk jam militant që pretendoj se qeveria do rrezohet me protesta, por jam qytetar që kërkoj të përmbyset sistemi i sundimit të Bosit për të vendosur sundimin e ligjit.
Në këtë fushë, pra në vendosjen e sundimit të ligjit, jam i gatshëm të kontribuoj pa orar dhe pa para. Në beteja personash nuk kam ndërmend të futem, megjithse e përsëris: e mbështes rotacionin politik!
