Kryetarja e LSI-së, Monika Kryemadhi kritikon takimin që do të mbahet ditën e sotme mes kryeministrit Rama, homologut maqedonas Zaev dhe presidentit serb Vuçiç.
Përmes një postimi në Facebook, Kryemadhi shprehet se ky takim pa Kosovën dhe vendet e tjera të Ballkanit është një iniciativë e nxituar. Ajo shton se takimi i sotëm për Mini-Shengenin nxit konflikte dhe lë shumë dritëhije pas.
Kryemadhi akuzon Ramën se po e përdor çështjen e Mini-Shengenit si presion ndaj BE-së.
“Kushtet e Bundestagut janë i vetmi udhërrëfyes që kanë qytetarët shqiptarë. Çdo shfaqje dhe propagandë tjetër vetëm dëmton rrugëtimin evropian të vendit”, shton ajo.
Postimi i plotë:
Nëse Mini Schengeni po përdoret nga Edi Rama për presion ndaj BE, ai duhet ta di mirë se perspektiva evropiane e Shqipërisë është e pazëvendësueshme. Kushtet e Bundestagut janë i vetmi udhërrëfyes që kanë qytetarët shqiptarë. Çdo shfaqje dhe propagandë tjetër vetëm dëmton rrugëtimin evropian të vendit!”
Mini Schengeni Ballkanik pa Kosovën dhe vendet e tjera të Ballkanit Perëndimor është jo vetëm një iniciativë e nxituar, por ajo nxit konflikt dhe lë shumë dritëhije pas. Këtë e konfirmoi edhe ambasadori Grenell pak kohë më parë kur theksoi se “ Ne besojmë se që kjo nismë të jetë e suksesshme, ajo duhet të përfshijë të gjithë në rajon, përfshirë qeverinë e Kosovës”.
LSI është në mbështetje të çdo marrëveshjeje dhe bashkëpunimi që sjell stabilitet dhe rritje ekonomike, por që ky të jetë një proces i besueshëm ka nevojë emergjente për transparencë. Sot të gjithë ne kërkojmë të dimë:
1. Çfarë është diskutuar mbi këtë marrëveshje?
2. Cilat janë pikat e bashkëpunimit për të cilat është rënë dakord?
3. Përse Kosova, Mali i Zi dhe Bosnja kanë refuzuar të jenë pjesë?
4. Çfarë përfiton dhe çfarë humbet Shqipëria?
5. A garantohet njohja e Kosovës nëpërmjet këtij bashkëpunimi?
6. Çfarë e detyroi Kryeministrin të vraponte drejt kësaj iniciative duke mos marrë parasysh Kosovën?
Nëse Mini Schengeni po përdoret nga Edi Rama për presion ndaj BE, ai duhet ta di mirë se perspektiva evropiane e Shqipërisë është e pazëvendësueshme. Kushtet e Bundestagut janë i vetmi udhërrëfyes që kanë qytetarët shqiptarë. Çdo shfaqje dhe propagandë tjetër vetëm dëmton rrugëtimin evropian të vendit!
