Kryetarja e LSI-së Monika Kryemadhi, e pyetur në lidhje me paketën “anti-shpifje”, u shpreh se problemi kryesor qëndron te kufizimi i lirisë së shprehjes së qytetarëve.
Përgjatë një interviste për “Nova Media”, Kryemadhi theksoi se Rama nuk do të mundë dot kurrë të mbyllë sarkazmën dhe gojën e qytetarëve.
“Tashmë vjen kulmi te liria e shprehjes. Jo vetëm fjala e portaleve sepse Rama kërkon ta bastardojë thjesht në portale apo thjesht në media online të cilat nuk kanë transparencën, nuk kanë çelësat e të tjera kështu me radhë. Problemi është te liria e shprehjes së qytetarëve. Tashmë njerëzit as nuk do të shikojnë më sepse do t’u mbyllen dhe sytë.
Sepse portalet ai nuk po i mbyll për fjalën, po i mbyll që njerëzit mos të shikojnë live sesi Edi Rama mashtron dhe sesi Edi Rama vjedh dhe korrupsionin haptas të qeverisë së tij. Sot ne dëgjuam sesi u dënua me 1 vit burg Ervin Salianji, sepse denoncoi një aferë, një trafik droge të vëllait të një ish-ministri të brendshëm. Mos u çudisni kur nesër, sesi Edi Rama ka shpallur një portal faqe terroriste”, tha Kryemadhi.
