Këshilli i Lartë i Prokurorisë ka përfunduar intervistat me tre kandidatët për kreun e SPAK-ut.
I fundit që ka prezantuar platformën e tij për drejtimin e SPAK ka qenë kandidati Edvin Kondili. Gjatë fjalës së tij, ai vuri theksin te krijimi i BKH-së dhe garantoi që në vizionin e tij është pavarësia e prokurorëve.
“Do të jap kontribut për krijimin sa më shpejt të BKH, është pjesë e pandashme e SPAK. Vetëm duke u krijuar sa më shpejt kjo, atëherë SPAK do të ketë mundësi të funksionojë në mënyrë totale dhe të realizojë pritshmëritë. Një tjetër objektiv është garantimi total i pavarësisë së prokurorëve. Duhet të ndryshojmë mentalitetin e prokurorit“, u shpreh ai.
Kondili vuri theksin gjithashtu dhe te shpejtësia e hetimeve. Sipas tij një drejtësi e vonuar është një drejtësi e mohuar. Sipas tij, baza e tij e punës do jetë hetimi proaktiv dhe plotësimi i pritshmërive të publikut.
“Një drejtësi e vonuar është drejtësi e mohuar. Hetimet do të bëhen me plane të qarta e afate. Uniteti puna në skuadër dhe harmonia mes hetuesve objektiv i imi. Hetimet proaktive duhet të kenë përparësi. Publiku pret rezultate nga ne. Hetimet financiare e pasurore do të kenë përparësi. Hetimi pasuror nuk duhet të jenë hetime të dorës së dytë. Hetimi pasuror çrrënjos strukturat e grupet kriminale duke i goditur asetet. Puna në grup, një qëllim të përbashkët e gjithë SPAK-ut“, tha Kondili
