Tamara Ecclestone, vajza e ish-kreut të Formula Uno-s, Bernie Ecclestone, njoftohet se është bërë pre e grabitësve, të cilët kanë vjedhur bizhuteri me vlerë 64 milion dollarë nga shtëpia e saj në Londrën perëndimore.
“The Sun” raporton se grabitja u krye gjatë një operacioni që zgjati 50 minuta.
Sipas tabloidit, tre hajdutë u futën në rezidencën e 35-vjeçares, pasi kishin shmangur dy ekipet e sigurisë 24-orëshe që patrullojnë gjatë gjithë kohës rrugën e njohur si “Lagjja e miliarderëve”, si dhe vetë operacionet e brendshme të sigurisë së familjes Ecclestone.
Në njoftim thuhet se në kohën e grabitjes, Tamara Ecclestone, një modele dhe emër i njohur në Britani, sapo ishte larguar nga vendi për pushimet e Krishtlindjes, shkruan “Voa”.
Një burim afër familjes konfirmoi që grabitja kishte ndodhur, por nuk pranoi të jepte hollësi të tjera.
