Një lloj virusi i rrallë i ka marrë jetën një adoleshenteje në Amerikë. Për fat të keq, mjekët nuk arritën që ta diagnostikonin në kohë sëmundjen e 17-vjeçares, e cila nuk ia doli dot mbanë.
Ariana Rae Delfs nga Jacksonville i Florida-s kishte përjetuar fillimisht simptoma të ftohti dhe dhimbje koke. Prindërit pasi e kishin parë gjendjen e vështirë të saj, menjëherë e kishin transportuar për në spital.
Ajo humbi jetën nga “sëmundja e puthjes”, ose siç njihet ndryshe mononukleoza, ndërkohë që doktorët besonin se kishte pësuar goditje në tru.
“Shkoi në banjo dhe krejt papritur nuk mund t’i ndjente këmbët. Fjalët ishin të paqarta. Ajo thjesht belbëzonte dhe mesa duket dëmtimi në tru sa kishte filluar”, ka thënë i ati i së ndjerës.
Më vonë doktorët e diagnostikuan me mononukleozë. Kjo sëmundje shkaktohet nga virusi Epstein-Barr dhe përhapet përmes lëngjeve trupore dhe pështymës. Fatkeqësisht virusi kishte shkaktuar dëmtime të rënda në trurin e Arianës.
“Truri i saj kishte shkuar në pikën ku nuk mund të funksiononte më”, është shprehur i ati i saj, i cili njoftimin për vdekjen e së bijës e bëri me anë të rrjeteve sociale.
