Lideri i Vetëvendosjes, Albin Kurti dhe ai i LDK-së, Isa Mustafa do të takohen brenda kësaj jave. Kjo është konfirmuar nga anëtarja e Kryesisë së Lëvizjes Vetëvendosje, Albulena Haxhiu.
Ky takim do të zhvillohet me qëllim për të finalizuar marrëveshjen për krijimin e Qeverisë së re të Kosovës.
Sipas Haxhiut, nëse LDK vazhdon të insistojë për presidentin atëherë alternativa e vetme është që vendi të shkojë në zgjedhje, ndërsa e konsideroi kërkesën e LDK-së të pakuptimtë.
Ndër të tjera, Haxhiu u shpreh se nuk ka pasur veprime të nxituara për krijim të koalicionit qeverisës pasi ende edhe presidenti i Kosovës, Hashim Thaçi nuk e ka thirrur seancën për konstituimin e Kuvendit të Kosovës.
Në një prononcim dhënë për “KosovaPress”, sipas saj çështja e presidentit është ajo që i ka dalluar këto dy subjekte politike, pasi që në të gjitha pikat e tjera janë dakordësuar.
