Gazetari Artan Hoxha deklaroi se grupet kriminale po shfrytëzojnë situatën kaotike që shkaktoi tërmeti i 26 nëntorit.
I ftuar në “Mbrëmje në Abc”, Hoxha u shpreh se teksa vëmendja është përqendruar tek dëmet e shënuara nga tërmeti, grupet vijojnë aktivitetin e tyre kriminal.
“Bota e krimit të organizuar, ku grupet e krimit ku gjithë vëmendja është e fokusuar te tërmeti kanë vazhduar të gjithë aktivitetin e tyre kriminal për të fituar sa më shumë para. Ka ca afate dhe kur të kthehemi ne në normalitet i kanë skaduar afatet. Afat ekstraligjore nuk i njeh jurisprudenca”, tha Hoxha.
Po ashtu, gazetari ka komentuar edhe nisjen e hetimeve për pasojat e tërmetit, teksa shtoi se të gjithë ata që kanë shkelur ligjin duhet të dënohen, pasi 52 persona të pafajshëm janë nxjerrë të pajetë nga rrënojat.
“Prokurori ende nuk ka mësuar zyrat, është shumë i ri në detyrë. Shumë mirë që i ka dhënë një prioritet tërmetit. Pasojat e ardhura nga shkelja e ligjit duhet të dënohen. Sot nuk kemi ende asnjë person të marrë të pandehur. Kanë humbur 52 jetë njerëzish të pafajshëm. Rasti i Thumanës është shumë flagrant. Edhe rasti i oficerit dhe fati i madh që aty nuk kanë qenë të vendosur studentët. Për rastin konkret pavarësisht propagandës prokurori dhe Prokurori duhet të jetë shumë e ftohtë dhe shumë më e shpejtë”, tha Hoxha.
