Një sistem tërësisht inovator mund të jetë në gjendje të parashikojë tërmetet në të ardhmen. Lajmi bëhet i ditur nga Mediafax. Sipas tyre, shkencëtarët izraelitë kanë ndërtuar një sistem që mund të parashikojë tërmetet të paktën 4 orë përpara se ato të regjistrohen.
Sistemi do të testohet në Universitetin Politeknik të Bukureshtit. Ky sistem do të jetë në gjendje të zbulojë nivelin, intensitetin dhe epiqendrën e përafërt të tërmetit.
Testimet e para për këtë sistem janë zhvilluar nga Greqi dhe Turqi me përqindje të lartë suksesi. Kompania që ka ndërtuar këtë sistem do ta testojë në rajonin rumun të Vrançës, një prej zonave sizmike më aktive të Europës. Sistemi do të nisë punën në gjysmën e parë të vitit 2020, kur do të fillojë tu sigurojë autoriteteve informacione mbi tërmetet për të treguar se si funksionon sistemi në praktikë.
Sistemi i ri i parashikimit u prezantua zyrtarisht në Rumani ditën e premte. Në të ardhmen, ky sistem pritet që të jetë në gjendje të parashikojë tërmetet deri në 8 orë para se ai të ndodhë.
Në testet paraprake nga 75 paralajmërime për tërmet që u lëshuan, 68 u konfirmuan nga Qendra Sizmologjike Mesdhetare Evropiane me një magnitudë mesatare prej 2,58 i shkallës Rihter. Duke konsideruar këto rezultate, “Ionoterra” vlerëson një saktësi prej mbi 97% parashikime, duke përdorur sistemin e plotë të monitorimit për tërmete mbi 4,5 të shkallës Rihter.
