Kryeministri i vendit Edi Rama nuk ka hezituar që edhe në mbledhjen e Komitetit Kombëtar të Rindërtimit të sulmojë mediat. Duke i quajtur “skandaloze” dhe “kriminale” të gjitha ato media që sipas tij kanë abuzuar me pasojat e tërmetit.
Në mbledhjen e Komitetit Kombëtar të Rindërtimit ishte i pranishëm edhe gazetari Marin Mema, i cili i kërkoi kreut të qeverisë që të mos ia adresojë fajin medias, por tek shumë njerëz dhe faktorë të tjerë që janë përgjegjës.
“Media nuk është macja e zezë e asaj që ka ndodhur. Më duket sikur po kërkojmë fajin te media. Ndërkohë që ka shumë faktorë të tjerë dhe shumë njerëz të tjerë që janë përgjegjës. Media nuk është skandaloze ka problemet e saj, por nuk do lejoja këtu që të quhen kolegët e mi dhe mediat skandaloze. Media nuk është për të rritur zërin e qeverisë por për të pasqyruar zërin e gazetarëve. Media ka problemet e saj, por ne jemi këtu si zëri dhe syri i qytetarëve. Ne do t’i qëndrojmë deri në fund kësaj pike”, tha gazetari Marin Mema.
Rama nuk u dakordësua me ndërhyrjen e gazetarit, duke zgjedhur që të replikojë me të. Ai jo vetëm që i ka cilësuar “skandaloze”, po akoma më keq – “kriminale”. Me argumentin se lajmet që përhapin panik mund të shkaktojnë një “bombë demografike”.
“Rrofsh, por pak më tolerant me opinionet e të tjerëve, se po del që është mbushur me diktatorë, media është skandaloze dhe nuk ka diskutim. Është një popull i tmerruar dhe ka njëmijë mënyra dhe 1 mijë kënde për ta vënë kamerën. Nëse ke sensibilitetin e momentit është që njerëzit duhet të marrin frymë. Kështu që mos u shqetëso për kategorinë por po ta them prapë, media është skandaloze. Dhe s’ka lidhje kjo me futjen e të gjithëve në një thes. Në këtë fazë, në këto ditë media është skandaloze dhe kriminale”, deklaroi kryeministri.
