I pranishëm në mbledhjen e Komitetit Kombëtar të Rindërtimit ishte edhe kreu i Shoqatës së Ndërtueseve, Artan Dulaku.
Gjatë fjalës së tij, Dulaku propozoi një tryezë trepalëshe me qeverinë, sistemin bankar dhe ata që posedojnë apartamente. Me qëllim që t’i jepet një zgjidhje shumë e shpejtë problemit të banesave, pas tragjedisë së 26 nëntorit.
“Kemi një situatë anormale në Durrës dhe Tiranë, ku kemi një fond gjigant shtëpisë të pashfrytëzuara. Janë mbi 2500 banesa, dhe thelbi i orientimit të mbledhjes së sotme do të ishte jo të merremi me fondacionin, por kam një lajm të keq për kryeministrin, ngarkesën do ta mbajë si gjithmonë i zoti i shtëpisë, që është qeveria.
Duhet të përgatitemi që tani, fatura deri në 300 milionëshe e tërmetit duam apo s’duam do bjerë mbi shpatullat e ministrit Ahmetaj dhe kryeministrit, që do e shpërndajnë pastaj mbi shpatullat e atyre që do merren me këtë punë.
Unë sugjeroj të shikohet mundësia që të bëhet një tavolinë trepalëshe, mes qeverisë, sistemit bankar dhe atyre që posedojnë këto apartamente që e kalojnë atë stresin e tërmetit dhe të gjendet një zgjidhje e shpejtë. Në këtë mënyrë, në një periudhë shumë të shkurtër ne mund t’i japim zgjidhje asaj që është plaga e banesave të ndërtuara. Është një veçori e jona, që kemi një superprodhim. Do ketë padyshim nevojë për ndërtime të reja, do ketë nevojë që çerdhe e kopshte të bëhen nga e para, por ky kontigjen është aty, do flejë dhe për 100 vitet e ardhshme. Ndërsa fondet që janë në qarkullim, do hyjnë më shpejt dhe do çlirojnë edhe rezervat në ekonomi”, deklaroi Dulaku.
