Gjatë 24 orëve të fundit, 42 tërmete me magnitudë më shumë se 3 ballë kanë goditur Shqipërinë. Në muajin shtator, kur Shqipëria u përfshi nga disa tërmete, nuk u ndjenë kaq shumë lëkundje, dhe të kësaj force sa dje.
Teksa disa persona patën fatin që ti gjenin familjarët dhe jo vetëm, në një kohë të shpejtë nën rrënoja, kishte dhe nga ata të cilët pritën me orë të tëra. Një i ri nga Durrësi është nxjerrë i gjallë nga rrënojat ku ndodhej prej afro 10 orësh, nga shembja e hotelit ‘Mianmar’.
Djali që u shpëtua ishte punonjës i hotelit që u shemb. I riu që u shpëtua ka reaguar duke treguar se ndodhet në gjendje të mirë. Ai është transportuar me ambulancë drejt spitalit. Djali është personi i 43-të që arriti të shpëtojë pas tërmetit të fuqishëm që preku Shqipërinë.
E dini për sa kohë mund të jetojë një njeri nën gërmadha? Zakonisht, Kombet e Bashkuara i pezullojnë operacionet e kërkim-shpëtimit 5 deri në 7 ditë pas fatkeqësisë, nëse në krye të dy ditëve nuk gjendet më askush i gjallë. Por ka pasur raste, që njerëzit kanë mbijetuar edhe më shumë se aq.
Majin e 2013-s, një grua u nxorr nga gërmadhat e një fabrike në Bangladesh, 17 ditë pas shembjes së godinës. Punonjësit në terren dëgjuan thirrjet e dobëta të saj për ndihmë, e përdorën pajisjet gjurmuese me video e audio, për t’i përcaktuar pozicionin e saktë.
Në vazhdën e tërmetit shkatërrimtar të Haitit, Janarin e vitit 2010, askush nuk mund ta çonte ndërmend se 12 ditë më vonë do të gjendeshin ende të mbijetuar. Kaq ishin ditët që kaloi një burrë në rrënojat e dyqanit ku punonte, i cili përveç të tjerash, edhe ishte grabitur vazhdimisht.
Prej katastrofës natyrore humbën jetën asokohe të paktën 200.000 vetë. Por rasti më i çuditshëm nga të gjithë është ai i një 40-vjeçareje të shpëtuar Dhjetorin e 2005-s, nga ajo çfarë kishte mbetur prej kuzhinës së saj, dy muaj pasi zona e Kashmirit të administruar nga Pakistani, u godit nga një tërmet i fuqishëm.
Mjekët e pranuan edhe vetë, se mbijetesa e Naqsha Bibi në një hapësirë aq të vogël, ku ishte e pamundur të lëvizje, nuk mund të cilësohet ndryshe përveç se mrekulli. Gruaja kishte arritur të qëndronte në jetë për 63 ditë, falë ushqimeve të kalbura që kishte pranë, dhe ujit të shiut.
Në orën 03:54 të mëngjesit, një tërmet i fortë, një prej më të fuqishmëve që ka goditur ndonjëherë vendin, tronditi mbarë Shqipërinë.
Disa ndërtesa u shembën në Durrës e Thumanë nga lëkundjet me magnitudë 6.4 në shkallën Rihter, e intensitet 9 ballë në epiqendrën e regjistruar 32 kilometër larg Durrësit, që u ndjenë edhe në Itali, Greqi, Kosovë, Serbi, Mal të Zi e vendet e tjera të rajonit.
Bilanci është tragjik. 16 viktima, 2 prej të cilëve fëmijë dhe mbi 600 të plagosur. 10 janë viktimat në Durrës.
