Partia Demokratike ka përshëndetur ngritjen e Prokurorisë së Posaçme Anti korrupsion, SPAK si mekanizmi i duhur për të luftuar krimin e organizuar dhe korrupsionin.
Sekretari i përgjithshëm i PD-së Gazment Bardhi ka deklaruar ditën e sotme se Shqipëria “ka një shans real për të luftuar krimin e organizuar dhe korrupsionin”.
“Krijimi i Strukturës së Posaçme kundër Krimit të Organizuar dhe Korrupsionit, e njohur gjerësisht si SPAK, është mekanizmi i duhur kushtetues për të përmbushur një nga kërkesat kyçe të shqiptarëve dhe të partnerëve të huaj për t’i dhënë fund pandëshkueshmërisë së të fortëve, promovuesve të tyre në politikë dhe zyrtarëve të korruptuar.
Megjithëse qeveria bëri gjithçka për ta vonuar ngritjen e SPAK-ut me 3 vjet, Partia Demokratike, e cila ka miratuar ligjin për ngritjen e tij dhe të Byrosë Kombëtare të hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture”, tha ai.
