Presidenti Meta ka dhënë një mesazh kumbues sot në Ditën Ndërkombëtare për Eliminimin e Dhunës ndaj Grave dhe Vajzave. Ai ka dënuar dhunën ndaj grave dhe vajzave.
Me anë të një reagimi në rrjetin social Facebook, Kreu i Shtetit apelon se nuk do të tolerohet aspak çdo akt burracak. Kjo dhunë verbale e fizike ndaj femrave.
Institucioni i Presidentit, do të solidarizohet me këtë nismë për shoqërinë tonë, dhe domosdoshmërinë e dënimit me të gjithë forcën e ligjit të dhunës ndaj grave dhe vajzave.
Mesazhi i Metës
Fenomeni i dhunës ndaj grave dhe vajzave nuk duhet rreshtur kurrë së dënuari. Çdo akt burracak dhune, verbale e fizike ndaj tyre, nuk mund dhe nuk duhet të tolerohet, sidomos nga një shoqëri si e jona, që familjen dhe vlerat e saj i vlerëson të shenjta.
Një shoqëri demokratike dhe sociale, nuk mund të ketë evolucion pa inkurajuar përpjekjet për fuqizimin e rolit të grave, veçanërisht pa përmbushur detyrimet për mbrojtjen e të drejtave të tyre.
Ndaj edhe sot në Ditën Ndërkombëtare për Eliminimin e Dhunës ndaj Grave dhe Vajzave, në mbështetje të fushatës botërore “Ta ngjyrosim botën portokalli”, Institucioni i Presidentit të Republikës do të solidarizohet me këtë nismë jetike për shoqërinë tonë, dhe domosdoshmërinë e dënimit me të gjithë forcën e ligjit të dhunës verbale e fizike ndaj grave dhe vajzave.
