Kandidati për kryeministër nga Lëvizja Vetëvendosje, Albin Kurti deklaroi se do të dërgojë para Prokurorisë edhe zyrtarë që i përkasin forcës së tij politike. Ndërsa theksoi se banesa e parë që u shemb në Prishtinë i përkiste një aktivisti të VV.
Teksa ishte i ftuar mbrëmjen e djeshme në emisionin “Open”, ai theksoi se nuk do të amnistojë askënd.
“Ne do ta çlirojmë prokurorinë dhe gjyqësorin nga ekzekutivi. Unë nuk jap amnisti. Do të çojë para Prokurorisë edhe zyrtarë të Vetëvendosjes. Në Prishtinë, shtëpia e parë që prishëm ishte shtëpia e një aktivisti pasi kishte një shtesë pa leje. Unë nuk jap amnisti për askënd”, tha Kurti.
Po ashtu, Kurti foli dhe për marrëdhëniet me kryeministrin Edi Rama.
“Shpreh pakënaqësinë time lidhur me keqpërdorimin që i bëhet kritikave dhe mospajtimeve mes meje dhe Ramës, dhe këto keqinterpretime bëhen nga ata që nuk duan bashkimin mes Shqipërisë dhe Kosovës. Kemi afërsi me PS-në, por dega jonë në Shqipëri, nuk është as pozitë dhe as opozitë”, shtoi ai.
