Gazetarja Rudina Xhunga ka komentuar aktualitetin politik në vend. Ku ka folur për “ngërçin” që ka krijuar në vend përplasja për emërimet në Gjykatën Kushtetuese, paralajmërimet e presidentit Ilir Meta dhe pasojat e të shkuarës.
Teksa ishte e ftuar në “News24”, Xhunga u shpreh se më së shumti i bën përshtypje reagimi i njerëzve ndaj krizës që ka mbërthyer vendin. Sipas saj, kriza nuk ka më impakt te njerëzit, ndërsa shtoi se kemi fituar një lloj qytetarie dhe afirmimi qytetar, që na bën më pak të ndjeshëm ndaj krizave politike.
Sa i përket paralajmërimit të kreut të shtetit se do të publikojë një video me fakte përvëluese, Xhunga tha: “Po ta përvëlojnë. Ata flasin për video përvëluese, e kërcënojnë njëri-tjetrin, por nuk e japin. Edhe mund të jetë, por nuk më intereson nëse përvëlohen politikanët, u përvëlofshin”.
Mes të tjerash, gazetarja tha se mënyra e komunikimit të Metës dhe Berishës tregon pafuqinë e tyre.
“Unë e besoj që reforma është bërë nga ndërkombëtarët. Ata po flasin shqip. Reforma në Drejtësi është nën kurimin e ndërkombëtarëve dhe do shkojë deri në fund nën ndikimin e tyre. Nuk mund të na pranojnë në BE me këtë drejtësi e zgjedhje që kemi.
Ne jemi në një prag ’91-shi, në kohën kur po përmbyset një regjim. Meta e Berisha tregojnë se mund të gënjejnë sërish Evropën, por nuk kemi kë gënjejmë më, nuk rikthehet më ’91-shi. Janë shqiptarët e 2019, të dielën ishin te panairi i bujqësisë, sepse kanë bërë para, ishin në panairin e librit, ishin në stadium”, theksoi Rudina Xhunga.
