Gazetarja Sonila Meço ka folur në lidhje me krizën politike në vend, duke u shprehur se alternativa e re është nyja gordiane e të gjitha diskutimeve që bëhen për zgjidhjen e saj.
E ftuar në studion e Ora News, Meço deklaroi se ndërkombëtarët duhet ta kuptojnë këtë alternativë të re. Ajo komentoi gjithashtu edhe nismën e marrë nga kreu i PD-së, Lulzim Basha, i cili ka nisur një tur në të gjithë Shqipërinë për prezantimin e programit të tij.
“Fjala alternativë ndoshta është nyja gordiane e të gjithë diskutimit. Ndoshta do ishte më i lehtë diskutimi për mbështetjen që Edi Rama ka nga ndërkombëtarët në momentin që artikulohet një alternativë e qartë që mund të jetë në atë ardhmen mundësia për të zgjidhur këtë krizë. Ndoshta ndërkombëtarët ende duhet të kuptojnë këtë alternativë. Ne kemi Bashën që ka dalë në një tur duke prezantuar programin e tij dhe gradualisht ekipin që rri në hije, për tu paraqitur si alternativë qeverisëse në të nesërmen.
Problemi qëndron se si do të shkojmë nesër në këtë alternativë të re. Nëpërmjet një procesi zgjedhor, i cili do të shkojë me reformë të realizuar apo të parealizuar. Do të jetë një reformë që do të përmbushë qëllimin primar që vota e shqiptarit të llogaritet, të jetë e barabartë dhe e vlefshme nga veriu në jug. Pra do të shkojmë me këtë?
E dyta, do shkojmë në një proces pas të cilit sërish në parlament do të kemi figura që mund të prodhojnë kriza të tilla, situata që mund të prodhojnë sërish opozita që mund të dalin jashtë parlamentit për shkak edhe të mungesës së reformës në drejtësi.
Këtu jemi veza, pulën apo pula vezën. Do të shkojmë drejt kësaj alternative, ose drejt kësaj zgjidhjeje imediate që mund të kërkonte edhe një marrëveshje momenti, por nuk do të zgjidhte dot një krizë kritike. Apo do duhet tani të shkundet nga themelet e gjithë historia?”, tha ajo.
