Rudina Hajdari është marrë në mbrojtje nga Garda e Republikës. Pas deklaratës se ishte kërcënuar në zyrën e saj, Kuvendi ka vendosur të marrë në mbrojtje deputeten.
Mësohet se ajo lëviz e shoqëruar me truprojë. Kryetarja e grupit parlamentar demokrat, Rudina Hajdari, lëshoi një deklaratë të fortë në datën 28 tetor nga foltorja e Kuvendit.
Ajo tha se u kërcënua me jetë në zyrën e saj, ndaj i kërkoi kreut të Kuvendit, të merren masa të rrepta për kontrollimin e personave që kanë akses në Kuvend dhe Kryesi, para se të ketë ndonjë viktimë.
Hajdari nuk dha emra, por bëri thirrje që të merren masa menjëherë.
Nga ana e tij, kreu i kuvendit, Gramoz Ruçi tha se çështjen ia adresoi ministrisë përkatëse.
