Pas qëndrimit të Holandës sa i përket hapjes së negociatave për Shqipërinë me Bashkimin Evropian, Tirana zyrtare i drejton një letër qeverisë holandeze.
Në letrën e firmosur nga gratë ministre të qeverisë sonë, theksohet se pak ditë më parë OKB-ja e njohu Shqipërinë si njërën prej pesë vendeve të globit me kabinetin më të balancuar gjinor.
“Tetë nga 15 ministritë në Qeverinë shqiptare drejtohen nga gratë; si nëna dhe vajza, si gra që luftojnë për familjet tona dhe për vendin tonë, ne do të donim të shtronim me ju një çështje që na shqetëson shumë të gjithëve, e cila ka rëndësi të jashtëzakonshme për të gjithë shqiptarët- perspektiva evropiane e vendit tonë”, thuhet në letër.
Ministret shkruajnë se pavarësisht vështirësive të hasura në këto 30 vite demokraci, ka pasur përparime të jashtëzakonshme. Sipas tyre, vendi po ndryshon për mirë çdo ditë, por nuk mungon gjithashtu ndërgjegjësimi që kemi ende një rrugë të gjatë për të bërë.
Nga ana tjetër, letra fokusohet edhe tek bashkëpunimi mes Shqipërisë dhe Holandës në luftën kundër krimit të organizuar, shkruan “Top Channel”.
“Shpresojmë ta kuptoni se sa e vështirë është beteja jonë, të cilën nuk mund ta fitojmë të vetëm”, thuhet më tej, “dhe disa nuk duan që ne ta fitojmë, përfshirë dhe një pjesë këtu në vendin tonë”.
“Dështimi i përpjekjeve tona për të çelur bisedimet e anëtarësimit është çmimi më i madh për këto forca të errëta. Ne nuk kërkojmë që të ndryshoni pikëpamjet tuaja, thjesht duam që të bashkoheni me kombet e tjera të Europës duke i shtrirë dorën Shqipërisë dhe të na lejoni t’i çojmë këto përpjekje tonat në të një tjetër nivel”, përfundon letra, shkruan “TCH”.
Në një letër drejtuar Parlamentit katër ditë më parë, qeveria e Holandës theksonte se hapja e negociatave konsiderohet e parakohshëm.
