Prokuroria për Krime të Rënda ka kërkuar 35 vite burg për Marjana Çmetën, nusen e cila akuzohet se vrau vjehrrën e saj, Lirie Lami në Kamëz. Ngjarja e rëndë ka ndodhur më 30 prill të vitit 2018. Krimin e rëndë, Çmeta e ka rrëfyer edhe para hoxhës Hysen Shehu, të cilit i tregoi se si e kishte bërë vjehrrën të pinte “lëngun magjik”, duke i thënë se ishte një pije që e konsumonin të gjithë për të shmangur sherret në familje. Por në fakt, lëngu ishte fotoksinë.
Si e helmoi nusja-vjehrrën
E reja i ofroi vjehrrës një lëng portokalli, në të cilin kishte hedhur helm minjsh, duke ja paraqitur si një lëng të përgatitur nga hoxha në mënyrë që të merrnin fund sherret mes tyre. Më pas duke parë që viktima nuk po ndërronte jetë, nusja ka kryer dhe veprime fizike, duke e mbytur me shall dhe pas reagimeve të viktimës e ka kafshuar në fytyrë dhe pjesë të tjera të trupit. Më pas ka njoftuar vëllanë e burrit të viktimës, banesa e të cilit ka qenë pranë, dhe e kanë transportuar për në spital duke e paraqitur si të vetëhelmuar.
Si u zbulua ngjarja
Video-regjistrimi u pa edhe nga Olti Lami, djali i viktimës dhe ish-bashkëshorti i autores së krimit. Nusja me vjehrrën ishin zënë fizikisht 5 muaj para se e reja ta helmonte. Vetë djali i të ndjerës, që pas ngjarjes u divorcua me nusen, thoshte se ajo ja dhunonte të ëmën. Rrëfimin e ftohtë e regjistroi hoxha në xhaminë e Qytet Studentit, dhe më pas ka vënë në dijeni djalin e të ndjerës, Olti Lamin i cili pasi e ka parë videon ka bërë denoncimin në Prokurorinë për Krime të Rënda, pasi vetë hoxha nuk e kishte raportuar në autoritete këtë ngjarje.
Hetimet
Kur ka ndodhur krimi, në banesë kanë qenë vetëm viktima dhe nusja e saj, autorja Marjana Çmeta. Kjo e fundit në dëshminë e dhënë fillimisht para hetuesve, nuk e ka pranuar krimin dhe ka thënë se ishte në gjumë gjatë gjithë kohës dhe kur është ngritur, ka gjetur në gjendje të rëndë vjehrrën e saj. Por këto deklarime nuk ishin bindëse për hetuesit, në kushtet kur në trupin e viktimës, e konkretisht në fytyrë dhe kokë, i janë gjetur shenja, si ato të kafshimit, apo dërrmishje. Shenja këto, që tregonin për një përleshje të Lirije Lamit me personin që e kishte vrarë.
“Provohet tej çdo dyshimi se shtetasja Marjana Çmeta në datën 30 prill 2017, gjatë kohës që ka qenë në banesën e saj së bashku me vjehrrën, viktimën Lirije Lami, i ka ofruar të pijë një lëng frutash në të cilën kishte hedhur një tabletë fotoksinë dhe se këtë helm e kishte marrë që më parë dhe e kishte ruajtur për të realizuar këtë vepër, dhe për ta bërë që të dukej si vetëhelmim.
Më pas, duke parë që viktima nuk po ndërronte jetë, ajo ka kryer dhe veprime fizike, duke e mbytur me shall dhe pas reagimeve të viktimës, e ka kafshuar në fytyrë dhe pjesë të tjera të trupit. Më pas, ka njoftuar vëllanë e burrit të viktimës, banesa e të cilit ka qenë pranë dhe e kanë transportuar për në spital, duke e paraqitur si të vetëhelmuar.
Edhe në deklarimet e para, kjo shtetase ka mohuar që të ketë kryer krimin, duke dhënë alibinë se viktima gjatë kohës që ka qenë në banesë, ka qëndruar për rreth një orë në një dhomë tjetër dhe kur ka shkuar, e ka parë shtrirë në gjendje të rëndë, ka njoftuar të afërmit dhe e kanë dërguar në spital”, thuhet në dosje.
