Gjatë qëndrimit në New York, Presidenti serb Aleksandar Vuçiç ka zhvilluar një takim me kancelaren gjermane Angela Merkel, e cila ka premtuar një vizitë në Serbi në vitin 2020 para skadimit të mandatit të saj.
Mediat serbe shkruajnë se Vuçiç ka nënvizuar pas takimit me kancelaren se ata kishin diskutuar për Kosovën dhe për ekonominë. Presidenti tha se nuk ka dyshim se Evropa dëshiron një zgjidhje për problemin e Kosovës dhe se Gjermania insiston në këtë drejtim.
Ai theksoi se është përsëritur në takim se bisedimet duhet të rifillojnë së shpejti dhe se duhet të mbahet një samit rajonal, duke nënvizuar se duhet të ketë bisedime intensive midis serbëve dhe shqiptarëve në mënyrë që të gjendet një zgjidhje. “Ata presin që ne të flasim dhe të flasim derisa të arrijmë në një zgjidhje”, tha Vuçiç. Ai tha se kishte ftuar kancelaren gjermane të vizitojë Serbinë. “Do të ishte një nder i madh për vendin tonë ta falënderoja për gjithçka që ka bërë”, theksoi Vuçiç.
