Presidenti i Serbisë, Aleksandar Vuçiç, ka zhvilluar një takim me kryeministrin grek, Kyriakos Mitsotakis, në Asamblenë e Përgjithshme të Kombeve të Bashkuara më New York. Sipas shërbimit për media i Presidencës serbe, Vuçiç ka kërkuar nga kryeministri grek, që Greqia të mos e ndryshojë qëndrimin e saj për mosnjohjen e Kosovës.
Në komunikatën e lëshuar ditën e martë, thuhet se Vuçiç e njoftoi Mitsotakis edhe me problemet që kanë lindur pas vendimit të autoriteteve në Kosovë, për t’iu vënë taksë prodhimeve të importuara nga Serbia. Më tej, Vuçiç e falenderon Greqinë për mbështetjen që i jep dialogut midis Beogradit dhe Prishtinës, për normalizimin e marrëdhënieve.
Në lidhje me këtë, Mitsotakis u shpreh se Greqia e mbështet dialogun, por konsideron se “veprimet e njëanshme nuk kontribuojnë në të”. Kryeministri grek qartësoi po ashtu se Greqia nuk ndryshon qëndrim, kur është në pyetje njohja e Kosovës.
