Tërmeti është fenomen i cili shkaktohet nga çlirimi i papritur i energjisë së grumbulluar, i cili shkakton krijimin e valëve sizmike. Tërmetet mund të ndodhin si rezultat i veprimit të forcave të natyrës, ose të shkaktohen si pasojë e aktivitetit njerëzor. Tërmetet që ndodhën dje dhe sot, na sjellin në kujtesë se sa me rëndësi është të jemi të mirëinformuar me hapat që duhen ndjekur gjatë një tërmeti, si dhe se çfarë mund të bëjmë për t’i parandaluar dëmet sa më shumë në të ardhmen.
Sizmologët kanë qetësuar qytetarët, duke vënë në dukje se rreziku kaloi. Ndonëse pasojat ishin në njerëz, por edhe dëme materiale, pas tërmetit të parë, ankthi më i madh ishte nëse do të kishte të tjera goditje po kaq të fuqishme.
Shumë qytetarë iu trembën idesë së një tërmeti të dytë të fuqishëm, por edhe për këtë, ka një siguri që vjen nga analizat shkencore. Shkenca siguron se propabiliteti që një tërmet i fuqishëm të pasohet nga një tërmet tjetër i madh brenda tre ditësh, është shumë i vogël, diku te 6 %.
Edhe në rastin e Shqipërisë, bazuar në vlerësimet shkencore, shanset që tërmeti me magnitudë 5.8 të shkallës Rihter të pasohet brenda tre ditëve nga një tjetër lëkundje janë shumë të pakta, ç’ka do të thotë se nuk ka vend për panik.
Sizmiologu grek, Akis Tselentis, tha se do të ketë vazhdimisht lëkundje për disa kohë, e ndërsa nuk pritet të ketë një tërmet tjetër shkatërrues.
Paralajmërimi i sizmologut grek: Priten lëkundje të tjera, kujdesuni për orët në vijim
Historia e tërmeteve në Shqipëri ka treguar se ka një goditje kryesore, dhe më pas janë qindra lëkundje që shoqërojnë fenomenin. Goditja e parë ka bërë dëmet në shumicën e tërmeteve që kanë rënë në Shqipëri 50 vitet e fundit. Pas goditjes së parë, nuk ka pasur më dëme dhe probleme, pasi forca e goditjes ka rënë dhe është totalisht e parrezikshme.
