Pedagogu që u shfaq në video-skandalin e transmetuar në emisionin “Stop”, është shtruar me urgjencë në pavionin e kardiologjisë në QSUT. Pas ngjarjes me studenten, pedagogu Denis Himçi ka pasur shqetësime në zemër dhe është dërguar në spital me urgjencë. Himçi në videot e publikuara shihet teksa bisedonte me studenten e tij, dhe u kërkonte favore seksuale.
Ai kërkonte nga studentja që ta puthte, nëse donte që ta merrte provimin. Nëse vajza ishte e gatshme për atë që i kërkonte, ai do t’ia zgjidhte të gjitha provimet, duke korruptuar edhe kolegët me njohje e dhurata. Dje “Fax News” zbuloi detaje të reja, mbi videoskandalin e pedagogut në Elbasan. Vajza në video është identifikuar si shtetasja me inicialet D.B. Ajo ka lindur më 20.04.1999 në Berat, por ishte shpërngulur me familjen në një fshat të Lushnjes.
Ka nisur studimet në fakultetin e Shkencave-Humane Bachelor në Universitetin e Elbasanit, për periudhën 2017-2020 në gjuhën Italiane. Mësohet se vajza ka dhënë vetëm provimet e simestrit të parë në shkurt të vitit 2018-të, në katër lëndë gjithsej. Më tej nuk e ka frekuentuar shkollën më. Vajza me iniciale D.B është rishfaqur në shkollë në prill të 2019-tës, pas një viti e disa muaj largimi, ka kërkuar menjëherë kontakt me pedagogun Himçi nëpërmjet një shoqeje të saj.
Vajza e ka takuar pedagogun, duke u justifikuar se kishte kryer mungesa për arsye shëndetësore, megjithëse burimet thonë se ka qenë jashtë vendit. Nga të dhënat zyrtare të Universitetit të Elbasanit, konstatohet se D.B, nuk ka hyrë në asnjë provim, pavarësisht takimeve me profesorin.
Sipas palës së akuzuar, është një kurth i pastër ndaj Denis Himçit, një familje e njohur për bindje të djathta në politikë dhe e angazhuar në strukturat e kësaj të fundit. Pas publikimit të videove në emisionin investigativ “Stop”, nën hetim janë edhe pedagogët e tjerë, të përmendura nga vetë Himçi.
Menjëherë pas video-skandalit, Rektorati i Universitetit “Aleksandër Xhuvani” mori masën e pezullimit nga detyra të pedagogut Denis Himçi. Në një deklaratë për mediat, shkruhet se Universiteti do të distancohet nga ndaj çdo sjellje të ulët e të padenjë, e cila cënon figurën e personelit akademik dhe imazhin e këtij institucioni të arsimit të lartë.
Rektorati ka vendosur ta pezullojë nga puna pedagogun Himçi, që në një video të publikuar nga emisioni “Stop”, shihej teksa kërkonte seks në këmbim të provimeve të një studenteje. Deri në zbardhjen e plotë të çështjes, Denis Himçi nuk do të mundet të ushtrojë dot më profesionin e tij si pedagog në Departamentin e Gjuhës Frënge dhe Italiane, të Fakultetit të Shkencave Humane, në Universitetin “Aleksandër Xhuvani” në Elbasan.
Drejtuesi i emisionit investigativ “Stop”, Saimir Kodra, i ftuar mbrëmjen e djeshme në “Opinion”, ka treguar prapaskenat e videoskandalit.
Saimiri nuk ka nguruar ta quajë vajzën që realizoi video-përgjimin “heroinë”, dhe tha se ishte instruktuar me kujdes nga ana e tyre, madje dhe për mënyrën si ishte veshur. Mbi të gjitha ai siguroi të ftuarit në studio dhe publikun, se studentja nuk e kishte provokuar pedagogun Himçi.
“Vajza ka vajtur me misionin e qartë që si ky që mua më kërkoi afera seksuale, pra vajzës, por mund të qëllonte edhe që mund të kërkonte lekë. Ka pasur raste që edhe pa fund. Por vajza ka vajtur me misionin e qartë: nuk provokoi sepse kishte ustallarë që e këshillonin, më falni për mungesën e modestisë, që i thashë se duhet të jesh e veshur, dhe po ta shikosh videon është e veshur me xhinse dhe bluzë të trashë, edhe pse është fundi i qershorit dhe fillimi i korrikut”.
