Në orët e para të mëngjesit të sotëm, persona të paidentifikuar kanë dëmtuar memorialin në nder të viktimave, që kundërshtuan tentativën e grushtit të shtetit në Turqi, memorial ky i vendosur në zonën e Liqenit Artificial në Tiranë
Ndërkohë, BalkanWeb ka publikuar disa foto të memorialit i cili duket se është marrë nën ruajtje nga Policia e Shtetit. Në foto duken 2 policë të cilët po ruajnë memorialin e rrethuar dhe mbuluar me rrjet jeshile që pengon shikimin e tij.
Kujtojmë se që në ditët e para, figura të njohura të politikës dhe artit shqiptar, u shprehën kundër vënies së këtij memoriali, duke kërkuar heqjen e menjëhershme të tij.
Memoriali i kushtohet viktimave të tentativës për grusht shteti në Turqi, më 15 korrik të 2016-ës, kundër presidentit Rexhep Tayyip Erdogan. Grushti i shtetit dështoi, ndërsa presidenti Erdogan bëri përgjegjës ish-mikun e tij, klerikun Fethulla Gylen, si autor të sulmit.
