Ministri i Brendshëm, Sandër Lleshaj, ka reaguar pas operacionit anti kanabis në malet e Krujës, duke theksuar se historia e kësaj bime narkotike në Shqipëri ka mbaruar. Lleshaj citon më tej se e ardhmja jonë janë vlerat europiane, dhe jo kanabisi.
“Operacioni i madh policor kundër kanabisit sot në Krujë, është një tjetër goditje e fortë që shpreh vullnet të palëkundur politik dhe kapacitete të plota operacionale.
Për ata që ende s’e kanë kuptuar: ka mbaruar historia e kanabisit në Shqipëri. E ardhmja jonë janë vlerat europiane. Jo kanabisi! Respekt për angazhimin e Policisë së Shtetit!”, shkruan ministri në Twitter.
Policia e Krujës ka arrestuar 19 persona dhe ka shpallur në kërkim 7 të tjerë, të akuzuar për “kultivim të bimëve narkotike”. Në operacionin për arrestimin e të dyshuarve kanë qenë të pranishme edhe Forcat e Ndërhyrjes së Shpejtë.
Sipas policisë, ky operacion, i cili u realizua pas 3 muajsh hetime, ka lidhje me të tjerë të zhvilluar më parë në zonë, ku janë arrestuar 27 persona dhe 2 janë shpallur në kërkim.
