Ish-deputeti i PD-së, Besnik Mustafaj deklaron se kalimi i dosjes 184 nga Prokuroria e Krimeve të Rënda te ajo e Dibrës, tregon kapitullimin e Krimeve të Rënda.
I ftuar në rubrikën “Opinion” në News24, Mustafaj tha se dosja 184 tregon përfshirjen në krim zgjedhor të funksionarëve të lartë të PS-së dhe të qeverisë. Më tej, ai shton se nuk beson se Prokuroria e Dibrës ka kapacitetin e duhur për të hetuar atë dosje.
“Unë mendoj se çështja nuk po gjykohet siç duhet. Dosja ka kaluar në Prokurorinë e Dibrës. Dërgimi në periferi i proceseve hetimore i kësaj dosje tregon kapitullim të Prokurorisë të Krimeve të Rënda përpara presionit qeveritar. Është shumë shqetësuese për drejtësinë vetë. Prokuroria e Dibrës s’ka kapacitet për hetim. Opozita ka fituar. Denoncimet e saj kanë bërë që Prokuroria të veprojë”, tha Mustafaj.
Ish-deputeti nënvizoi se opozita e bashkuar do të rinisë protestat në shtator, si formë e vetme kundër së keqes së madhe të Shqipërisë, qeverisjes së vendit.
“E vetmja gjë që nuk ndryshon është protesta. Opozita proteston, sepse nuk ka fromë tjetër për të treguar se kjo qeveri ka humbur çdo lloj legjitimiteti. Për mua opozita duhet të çlirohet nga kompleksi i paqësores. Njerëzit janë të zemëruar. Ne shohim përditë protesta të fuqishme kudo në botë dhe këtu mund të jenë të njëjta protestat, të fuqishme, sepse e tillë është situata. Mendoj se protestat s’mund të jenë më si festë”, tha ai.
