Ish-deputeti i Partisë Demokratike, Luçiano Boçi,ka akuzuar qeverinë për dështim të politikave arsimore, pasi sipas tij, 42% e forcës aktive për punë në Shqipëri rezulton me arsim 8-9 vjeçar.
Përmes një postimi në Facebook, Boçi shprehet se kjo braktisje e madhe në arsim ka ardhur si pasoje e pamundësisë ekonomike nga familjet shqiptare dhe nga emigracioni galopant.
Sipas ish-deputetit, paratë e dedikuar fëmijëve dhe të rinjve grabiten, vidhen me PPP, koncesione e 100 marifete.
Postimi i Luçiano Boçi:
TURP E SKANDAL, 42% e forcës aktive për punë në Shqipëri rezulton me arsim 8-9 vjeçar. Vendi i tretë në Europë me përqindjen më të lartë.
Tjetër skandal dhe turp ky! Kjo renditje ndjek atë për IQ ku Shqipëria renditej e parafundit. Dështim total i politikave arsimore.
Kjo dëshmon braktisjen e madhe në arsim, ku shkaku kryesor mbetet pamundësia ekonomike e familjeve shqiptare dhe emigracioni galopant. 135 mijë ka shkuar numri i braktisjes nga fëmijët dhe të rinjtë i cikleve arsimore në këto vite. Renditja hedh poshtë alarmin e rremë për diplomime të pakufishme për të rinjtë, për shkak të numrit të madh të universiteteve.
Ajo godet politikat e zbatuara nga Rama&company për të penguar të rinjtë shqiptarë të vazhdojnë arsimin e lartë dhe mungesën e stimulimit për të ndjekur arsimin e mesëm. Të dy klasifikimet rikthejnë shqetësimin për financimin e arsimit. Arsimi në Shqipëri mbetet sektori më pak i mbështetur dhe më pak i financuar. Vetëm 56 $ për frymë. Ndërsa në vendet e përparuara kjo shifër shkon nga 1000 deri në 3500 $ për frymë.
Por në Shqipëri paratë e dedikuar fëmijëve dhe të rinjve grabiten, vidhen me PPP, konçesione e 100 marifete. Me Ramën, fëmijët tanë, të rinjtë dhe arsimi i tyre nuk kanë të ardhme. Hajduti psiqik i votave është hajduti i së ardhmes. Largimi i tij domosdoshmëri jetike për vendin.
