Kërkesa e deputetëve të Partisë Socialiste për shkarkimin e ish-ministrit Arben Malaj nga Këshilli Mbikëqyrës i Bankës së Shqipërisë, i është dorëzuar kreut të Kuvendit, Gramoz Ruçit.
Grupi i PS-së, në shkresën dorëzuar Kuvendit, vlerëson se në asnjë prej prononcimeve publike, Malaj nuk i ka shërbyer interesit më të mirë të BSH-së, si edhe të gjithë sistemit bankar në Shqipëri.
“Secila prej daljeve publike të anëtarit të Këshillit të Mbikqyrjes dhe të gjitha rastet së bashku mund të çojnë në konkluzionin që temat e trajtuara dhe qëndrimet e shprehura, mund të kenë ndikim negativ mbi detyrimet që ai ka ndaj Bankës së Shqipërisë dhe duke qenë se ato shprehin qëndrime dhe vlerësime që janë pjesë e analizave politike të lidhura me grupime politike, besojmë se ato dëmtojnë imazhin e Bankës së Shqipërisë”, thuhet mes të tjerash në shkresën dërguar Ruçit.
