Ish-deputeti i Partisë Demokratike, Ervin Salianji, zbuloi disa detaje në lidhje me protestën e 10 kombëtare. Në studion e lajmeve të ‘Fax News’, Salianji tha se ligjërisht këto zgjedhje janë të pavlefshme dhe nul. Sikundër një pjesë e mirë e të djathtëve, ai i mëshoi fort faktit se u vërtetuan me pamje se zgjedhjet u manipuluan, dhe se nuk do ndalen deri në realizimin e objektivit për zgjedhje të lira. Referuar çështjes së mbushjes së kutive me vota të pavlefshme, ai tha se janë votat e administratës të cilët janë kërcënuar me punën e tyre.
Pse nuk e tërhiqni kryetarin e KQZ, duke qenë se qëndrimi i tij nuk ka asnjë vlerë për ju?
Nuk është saktësisht kështu, nuk është në tagrin tonë që të tërheqim përfaqësues që për shkak të ligjit, që të tërheqim dikë që supozohet i pavarur dhe mbi të gjitha është një votë që ka peshën e njëjtë me anëtarët e tjerë të KQZ-së.
Protesta e 8 korrikut, çfarë prisni nga ajo?
Është një situatë ku ne presim masivitet dhe përkrahje, dhe ku ne do të falenderojmë qytetarët për sakrificën dhe mbështetjen kundër Edi Ramës dhe zgjedhjeve të 30 Qershorit. Rama e ktheu këtë datë në një referendum, dhe ai e ka humbur rëndshëm. E vetmja alternativë e tij ishte pjesmarrja. Nëse do të merrnin pjesë 35% të shqiptarëve, atëherë do të kishte të drejtë. Por ai në rastin konkret duhej që së paku të jepte dorëheqejen, por ai nuk e ka bërë asnjëherë këtë gjë. Ne e dinim që në fillim se beteja nuk ishte e lehtë, por ne do të vijojmë deri në fundin e saj.
A ka një skenar për zhvillimin e protestës së 10 kombëtare?
Ne i kemi dhënë rëndësi gjithmonë pjesmarrjes së madhe. Ndërkohë që kërkesat që kemi për të shtruar është largimi i Ramës, zhvillimi i zgjedhjeve të parakohshme, dhe së fundmi edhe hetimin e shpejtë të dosjeve të dala nga përgjimet e fundit. Është një tjetër akt i opozitës së bashkuar e cila do të vazhdojë të bind dhe të ofrojë alternativa të reja për qytetarët. Për të krijuar mundësi dhe kushte reale për qytetarët shqiptarë, që fatkeqësisht po ikin masivisht.
Është pjesë e skenarit zhvendosja e protestës para Kuvendit?
Ne jemi vetëm në situatën ku dimë se do të ketë pjesmarrje të madhe, dhe ne po shkojmë në çdo qytet dhe po bëjmë thirrje kudo nëpër media për të marrë pjesë masivisht më 8 korrik.
Ju thoni se nuk i njihni zgjedhjet, si do ta konkretizoni këtë qëndrim?
Ne themi se këto nuk ishin zgjedhje. Në këtë kuptim, këto nuk mund të jenë një imponim ndaj qytetarëve për ti zhvatur edhe 4 vjet. Së dyti, ligjërisht këto zgjedhje janë të pavlefshme dhe nul, dhe me të drejtë janë cilësuar kështu edhe nga OSBE/ODHIR, ku u konstatua mbushja e kutive të votimit dhe manipulimi i pjesmarrjes. Ka një datë të re nga presidenti, dhe të shohim çfarë do të ndodhi. Ne do të vazhdojmë edhe ligjërisht ta godasim, por edhe të presim zgjedhjet e lira.
Çfarë vendimi është diskutuar se do të merret për lirimin e zyrave nga ana e kryebashkiakëve të djathtë?
Kryetarët e Bashkive të zgjedhur nga qytetarët dhe ligjërisht nuk besoj se do të braktisin detyrën për t’ua dhënë kryetarëve socialistë të zgjedhur në mënyrë të paligjshme. Nuk është se ka një vendimmarrje të PD-së se përderisa ligjërisht nuk ka zgjedhje, edhe logjikisht ne nuk kemi pse marrim një akt për një vendim se është çmendur dikush përballë.
