Kryeministri Edi Rama, në një deklaratë për shtyp ka komentuar zgjedhjet e mbajtura sot. Duke i cilësuar ato si një përgjigje për kundërshtarët dhe fitoren e radhës së socialistëve, kryeministri bëri një vet-reflektim teksa tha se brenda PS-së do të ketë një debat të brendshëm, për të gjitha gabimet e deritanishme.
Në vijim, Rama la të hapur mundësinë për dialog me opozitën por pa kushte, në mënyrë që ajo t’i shërbejë integrimit të vendit.
Fjala e Ramës:
Brenda Partisë Socialiste do të ketë një debat të brendshëm për të analizuar qeverisjen vendore dhe jo vetëm, për të programuar të tëra korrigjimet e nevojshme në funksion të sfidës tashmë të vështirësuar në një debat të madh, në funksion të korrigjimeve të nevojshme.
Një debat për të analizuar edhe pozicionin tonë të ri dhe me marrëdhëniet ndërpartiake, me opozitën parlamentare dhe joparlamentare.
Plaga e hapur kërkon durim dhe ne do bëjmë çmos. Ata sot janë aty ku meritojnë, në gropën ku donin të fusnin Shqipërinë, drejtësinë dhe qeverinë.
Mbetet për t’u parë sa kohë do bëjnë sikur nuk shikojnë, nuk dëgjojnë, as Zoti vetë nuk i shpëton dot nga rrënimi përfundimtar nëse kërkojnë ë disfatën tek tjerët. Nëse duan paqe politike, paqe do të kenë dhe ajo do fillojë duke u tërhequr nga sulmet ndaj Shqipërisë.
Nëse duan marrëveshje për Shqipërinë, marrëveshje do kenë, dhe ajo ndërtohet me dialog pa kushte, me vullnet për t’u angazhuar në favor të çeljes së negociatave, të cilën s’e kemi ne në dorë. Reforma zgjedhore mbetet një sfidë e përbashkët me opozitën parlamentarë dhe atë joparlamentare. Reforma në drejtësi nuk mund të diskutohet dhe as tolerohet, por vetëm mbështetet.
