Të tjera detaje kanë dalë në lidhje me krimin e ndodhur ditën e sotme në fshatin Babicë të Vlorës, ku Lavdosh Sula, 56 vjeç goditi për vdekje gruan e tij, Laureta Sula, 44-vjeçe.
Autori i vrasjes, pasi lajmëroi policinë, deklaroi se e shoqja e tradhtonte prej 5 vitesh.
Ndërkohë, burime për “Faxweb.al”, bëjnë me dije se vëllai i autorit që kreu krimin, Artur Sula ka tentuar të vrasë para 6 ditësh shtetasin L. Sejdiraj, pasi dyshonin se kishte lidhje jashtëmartesore me 44-vjeçaren.
‘’Para 6 ditësh, vëllai i Lavdosh Sules, Artur Sula ka shkruar të vrasë me armë gjahu L. Sejdiraj (dyshonin se L. Sejdiraj kishte lidhje jashtë martesore me viktimën e sotme). Konflikti në familjen e Lavdosh Sules kishte disa dite që ishte agravuar. Policia ka qenë ne dijeni, sepse për ngjarjen e para disa diteve ka arrestuar Arben Sulën”, bëjnë të ditur burimet për Faxweb.al.
Njoftimi i policisë për ngjarjen e datës 19:
Tenton të vrasë me armë gjahu kurshuririn e tij – vihet në pranga nga policia autori.
Mbrëmjen e djeshme pas marrjes së informacionit se në fshatin Babicë e Madhe ka konflikt me armë midis dy personave, menjëherë shërbimet e policisë janë afruar në vendin e ngjarjes duke bërë parandalimin e një vrasje të mundshme.
Konkretisht në vendin e quajtur “Alikokë” Babicë e Madhe, shtetasi A. S., 44 vjeç, ka tentuar të vrasë me armë gjahu (teke) shtetasin L. S., 46 vjeç, për motive të dobëta (kurshurinj me njëri-tjetrin).
Policia ka bërë kapjen dhe arrestimin e menjëhershëm të shtetasit A. S, për veprat penale “Vrasje me dashje, e mbetur në tentativë” dhe “Prodhimi dhe mbajtja pa leje e armëve të gjuetisë dhe atyre sportive”.
Materialet i kaluan Prokurorisë për veprime të mëtejshme.
Njoftimi i policisë për vrasjen e ndodhur sot:
Në orën 12:52, në fshatin Babicë e Madhe, Vlorë, pas një konflikti në familje dyshohet se shtetasi L. S., 56 vjeç, ka goditur me mjet të fortë (levë hekuri) bashkëshorten e tij 44 vjeçare L.S.
E dëmtuara u shoqërua për ndihmë mjekësore në Spitalin e Vlorës por për shkak të dëmtimeve të marra në orën 13:30, njofton Spitali se ka ndërruar jetë.
Policia ka shoqëruar menjëherë bashkëshortin, shtetasin L.S., si autorin e dyshuar në lidhje me ngjarjen për të cilin po vijojnë veprimet e mëtejshme në lidhje me arrestimin e tij.
Grupi hetimor ndodhet në vendin e ngjarjes duke kryer veprimet hetimore në lidhje me sqarimin e rrethanave.
