Kreu i Grupit Parlamentar të PS, Taulant Balla gjatë një takimi me banorët e Elbasanit në kuadër të fushatës elektorale, ndër të tjera ka deklaruar se PD do të rilindë pas 30 qershorit, me largimin e Lulzim Bashës.
“Të qëllosh me gurë kundër parlamentit, të tentosh t’i vesh zjarrin parlamentit dhe t’u vesh zjarrin shkollave, këtë nuk e bën as pushtuesi. Të jeni të sigurt që përtej 30 Qershorit do të kemi mundësinë të shohim edhe Partinë Demokratike të rilindë pasi Luli të ketë ikur”, u shpreh Balla gjatë një takimi në Elbasan.
I menjëhershëm ka qenë edhe reagimi i Sekretarit të Përgjithshëm të PD-së, Gazmend Bardhi i cili ka replikuar me anë të disa postimeve në Twitter.
Bardhi i bën thirrje Ballës që të zgjohet nga gjumi pasi sipas tij ai “mund të emërojë shefa policie të lidhur me krimin, shefa të korruptuar tatimesh e doganash që vjedhin shqiptarët për xhepin e rilindjes” por që ai nuk mundet dot të emërojë edhe opozitën.
Postimet e Gazmend Bardhit:
Taulant, zgjohu nga gjumi! Mjaft ëndërrove për një Shqipëri si të Enverit. Ti mund të emërosh shefa policie të lidhur me krimin, shefa të korruptuar tatimesh e doganash që vjedhin shqiptaret për xhepin e rilindjes, por nuk ke per te emëruar dot opozitën!
Ndërkohë, ka ardhur dita qe Edi yt dhe gjithë banda e tij, te dale para drejtësisë per krimet ndaj shqiptareve. Jeta e tij e trete është afër! Ne rastin me te mire, do te behet rrobaqepës tek 313!
